Ja, das isch lang här, sit d Feusenou es läbigs Quartier isch gsy und me aues für e täglech Gebruuch fasch vor der Hustüür het chönne choufe. Viu isch passiert i dene Jahre, Schöns und Wüeschts, Glücklechs und Truurigs, Luschtigs und weniger Luschtigs. Aber das wüsset dihr ja säuber o, wie das so geit. I bi i der «Feuse» ufgwachse und bim Zrüggluege dünkts mi, d Zyt syg nume so dervogrennt. Und wenn i de ab und zue mau dert verbyfahre, göh mir ganz viu Erinnerige dür e Chopf.

Autorentext
D Outorin isch am 31. Ouguscht 1939 uf d Wäut cho. Si isch verhüratet und het zwöi erwachseni Ching und en Änku. Ursula Meier-Nobs schrybt Churzgschichte, bärndütschi Chinderbüecher wi «Ds Müüsli Surimuri mit em Örgeli» oder «Hasefritz u Matten-Edi», derzue Chindertheater und o historischi Romän wi «Die Musche» oder «Der Pfauenruf».